Innlent | mbl | 2.11.2025 | 11:02 | Uppfært 3.11.2025 12:04

Banvænasti fellibylur ársins dynur á Íslandi

Fellibylurinn reið yfir Jamaíku og seinna Kúbu með miklum ofsa og varð tugum að bana. AFP/Ricardo Makyn

Leifarnar af fellibylnum Melissu, sem orðið hefur 50 manns að bana í hið minnsta, munu ganga yfir suðurströnd Íslands á morgun og þriðjudag í formi lægðar.

Að mati veðurfræðings er þó ekkert að óttast.

Birgir Örn Höskuldsson, veðurfræðingur á Veðurstofu Íslands, segir í samtali við mbl.is að hin væga lægð sem fellibylurinn skilur eftir sig muni valda litlum sem engum breytingum í veðri.

Melissa stefnir á Kúbu: Mikið tjón á Jamaíka

Stefnir í rólegheitaveður

„Leifarnar af fellibylnum hafa ummyndast í þessa lægð sem gengur yfir landið sunnanvert á morgun og þriðjudag, en allur fellibylskrafturinn verður farinn úr henni svo hún verður lítið kraftmeiri en hver önnur lægð,“ segir Birgir.

Lægðin sé djúp í millibörum, en ekkert útlit sé fyrir veðurvonsku, hvað þá heldur veðurviðvaranir.

„Hún varð ekki eins og stundum verður þegar fellibylir ganga inn í venjulegar lægðir, en þá geta þær orðið mjög djúpar og valdið illviðrum. Það hefur ekki gerst núna, þetta virðist ætla að verða rólegheitaveður.“