247 þúsund farþegar

Fram kemur m.a. að 247.160 farþegar hafi komið með skipunum á þessu ári, en verulegar tekjur renna til samfélagsins þegar farþegar og áhafnir skipanna greiða fyrir vörur, þjónustu og afþreyingu.

Í rannsóknum sem gerðar hafa verið á kauphegðun farþega og áhafna skemmtiferðaskipa kemur fram að meðaleyðsla hvers farþega sé um 23.000 krónur og meðaleyðsla áhafnar sem fer í land sé um 11.000 krónur á mann.

Ekki kemur fram í tilkynningu hve margir áhafnarmeðlimir skipanna hafi komið í land, en hvað farþegana varðar er áætlað að þeir hafi eytt tæpum 5,7 milljörðum fyrir vörur, afþreyingu og þjónustu í bænum, að því gefnu að þeir hafi allir drepið niður fæti þar. Er þá eyðsla áhafnar ótalin.

Mælt fyrir um styrktarsjóð

Tekjurnar sem renna í hafnarsjóð eru tilkomnar vegna gjalda sem skipafélögin greiða fyrir afnot af höfninni og þá þjónustu sem þar er í boði. Þannig voru t.d. seldir 9.579 rúmmetrar af vatni til skipanna.

Bæjarstjórn hefur samþykkt stefnu og aðgerðaáætlun um móttöku skemmtiferðaskipa í höfnum Ísafjarðarbæjar fyrir árin 2024-2027, en með henni er ætlunin að bæta upplifun gesta, minnka álag á samfélagið, bæta umhverfismál og tryggja sjálfbærni atvinnugreinarinnar til lengri tíma.

Þar er m.a. mælt fyrir um sérstakan styrktarsjóð sem úthlutar fjármunum til viðburðahalds og samfélags- og fegrunarverkefna.

Þá miða nokkrir liðir áætlunarinnar að því að bæta innviði sem nýtast farþegum skipanna. Þar á meðal eru fjölgun almenningssalerna, fjölgun bílastæða fyrir ferðaþjónustuaðila, hönnun móttökuhúss á Sundabakka og bættar gönguleiðir á hafnarsvæðinu.