Innlent | mbl | 4.11.2025 | 19:27

Ládeyða veðurs fram að helgi

Hitaspákort Veðurstofu fyrir hádegið á morgun, miðvikudag. Veður verður rólegt og einfalt fram að helgi að sögn veðurfræðings. „Logn var veðurs“ er kunn veðurlýsing úr sögu Ólafs helga í Heimskringlu þar sem segir af því er konungur fór með her manna til Hringisakurs og tók Hrærek konung sem Ólafur sendi svo í útlegð til Íslands þar sem Hrærekur dó og er grafinn. Landsmenn mega búast við því að logn verði veðurs fram að helgi, tiðindalítið veður. Kort/Veðurstofa Íslands

„Það verður bara mjög rólegt og einfalt veður tiltölulega, fram að helgi. Svo verður aðeins hvassara um helgina, allhvass vindur og hlýnar aðeins,“ segir Teitur Arason, veðurfræðingur á Veðurstofu Íslands, er mbl.is þýfgar hann um veðrið næstu daga sem er tíðindalítið eftir nýafstaðna áminningu veturs konungs um að hann sitji enn á köldum veldisstóli hvað sem hnatthlýnun líði.

Súld, slydda, smáskúrir

„Þetta er bara mjög róleg vika og lítið að gerast í veðrinu hjá okkur,“ segir Teitur og spáin á síðu Veðurstofunnar styður þau orð en hún gerir ráð fyrir norðlægri átt með 3 til 10 metrum á sekúndu, dálítilli súld eða slyddu norðan- og austanlands, smáskúrum með suðurströndinni en bjartviðri á Vesturlandi.

Á morgun gerir stofan ráð fyrir austlægri átt, 3 til 10 metrum á sekúndu, skýjuðu með köflum og lítilli úrkomu. „Rigning af og til sunnanlands undir kvöld og bætir í vind við ströndina,“ segir í spá sem gerir ráð fyrir hitastiginu 2 til 6 gráðum yfir daginn.