Áður, eða fram til 2004, gekk naglatíminn í garð þann 15. október og var fram í miðjan apríl.

„Hér hafa þúsundir bíla farið í gegn hjá okkur á síðustu dögum. Þetta er einhver sú mesta törn í dekkjaskiptum sem okkar menn hafa kynnst,“ segir Hermann Elí Hreinsson, forstöðumaður bílaþjónustu hjá N1.

Fyrirtækið starfrækir alls sjö hjólbarðaverkstæði á höfuðborgarsvæðinu og þar hefur mikið verið umleikis að undanförnu. Nokkrir forsjálir höfðu lokið dekkjaskiptum fyrir hvellinn mikla en eins og verða vill fór allt á snúning þegar jörð var orðin fannhvít og færð spillt.

„Ég gæti trúað að um 60% þeirra bíleigenda sem til okkar koma velji nagladekkin, sem eru auðvitað það sem best dugar í hálku og þegar glæra liggur yfir götum. Annars eru sveiflur í því hvernig dekk fólk velur og reynsla til dæmis frá síðasta vetri hefur alltaf mikið að segja,“ tiltekur Hermann.

Hann segir starfsmenn á dekkjaverkstæðunum miðla af sinni þekkingu til viðskiptavina en hvernig dekk þurfi ráðist af aðstæðum hvers og eins.

Ónegld heilsársdekk standa fyrir sínu

„Fólki sem er á ferð eldsnemma á morgnana áður en götur hafa verið saltaðar og geta því verið hálar hentar mögulega best að vera með neglda hjólbarða. Sjálfur fer ég gjarnan til vinnu laust fyrir klukkan átta á morgnana þegar færi er komið í lag og búið að saltbera. Þá er ekki sama þörf á að vera á nagladekkjum og hjá þeim sem fara fyrr af stað.

Annars er engin algild regla í því og ónegld heilsársdekk standa fyrir sínu. Sé fólk í reglulegum ferðum á Reykjanesbraut eða um Hellisheiði held ég að nagladekk séu þó eina vitið,“ segir Hermann Elí.