Ísland ekki með á lista ESB

Þorgerður Katrín Gunnarsdóttir utanríkisráðherra telur ekki að þetta hafi nokkra þýðingu varðandi stöðu Íslands gagnvart Evrópusambandinu, en áhöld hafa verið uppi um hvort aðildarumsókn Íslands frá 2009 sé enn í gildi.

„Ég ætla bara að undirstrika það sem við höfum alltaf sagt og Evrópusambandið hefur líka sagt, að umsóknin er virk. Það er þó, eins og við höfum margítrekað, íslensku þjóðarinnar að ákveða hvort hún setji ferlið aftur af stað. Það er íslenska þjóðin sem ræður því og ef hún segir já, þá er kerfið þannig að umsóknin er virk.“

Ráðherra telur það ekki hafa neina þýðingu að Ísland hafi ekki verið meðal þeirra ríkja sem fjallað er um í stækkunarpakkanum, en þar á meðal er Tyrkland, sem sótti um aðild árið 1987, en er þó ekki í aðlögun nema að nafninu til.

„Umsóknin er virk, en verður ekki endanlega virk fyrr en íslenska þjóðin er búin að taka ákvörðun um að fara þessa leið. Ef íslenska þjóðin segir já þá er það ferli sem verður mun styttra en ella hefði verið. Það er bara alveg skýrt.“