Oddviti Samfylkingarinnar í Kópavogi segir í tilkynningu, að ljóst sé að frá byrjun hafi enginn vilji verið hjá framsóknarmönnum í bænum til að mynda nýjan meirihluta með Samfylkingu og Vinstri-grænum, en samt sem áður hafi þeir kosið að halda öllum aðilum volgum í þeirri von að þannig myndu þeir bera mest úr bítum.
Tilkynningin er eftirfarandi:
Samfylkingin hafnar algjörlega slíkum vinnubrögðum, við tökum ekki þátt í meirihlutaviðræðum þar sem við skilum inn lokuðum tilboðum og öllum málefanalegum viðræðum er hafnað. Slíkt minnir meira á þátttöku í lokuðu útboði án útboðsgagna og á ekkert skylt við málefnalegar lýðræðislegar viðræður. Því er ljóst að frá byrjun hefur enginn vilji verið hjá framsóknarmönnum í Kópavogi að mynda nýjan meirihluta með Samfylkingu og Vinstri Grænum en samt sem áður hafa þeir kosið að halda öllum aðilum volgum í þeirri von að þannig myndu þeir bera mest úr bítum.
Nú liggur fyrir að Samfylkingin hefur styrkt stöðu sína í bæjarstjórn Kópavogs og þrátt fyrir að verða áfram í minnihluta næstu 4 árin munum við berjast fyrir velferð og bættum hag Kópavogsbúa og veita meirihlutanum traust aðhald í öllum málum.
Guðríður Arnardóttir,
oddviti Samfylkingarinnar í Kópavogi.