Erlendir fjölmiðlar fylgjast grannt með þingkosningum á Íslandi í dag og hefur mikið verið fjallað um þær undanfarna viku. Einkum er það mikið fylgi Pírata í skoðanakönnum og að boðað hafi verið til kosninga fyrr vegna Panamaskjalanna sem vekur athygli erlendra fjölmiðla.
Kjörtímabilinu átti ekki að ljúka fyrr en næsta vor en í kjölfar upplýsinga sem birtar voru í Panamaskjölunum í byrjun apríl sagði Sigmundur Davíð Gunnlaugsson af sér sem forsætisráðherra og Sigurður Ingi Jóhannsson, tók við embættinu. Fljótlega var farið að ræða um að kjósa í haust og undir lok sumars var ákveðið að alþingiskosningar færu fram í dag.
Undanfarið ár hefur fylgi Pírata mælst um og yfir 20% en hefur dalað undanfarna daga á sama tíma og fylgi Sjálfstæðisflokksins hefur vaxið. Píratar fengu þrjá menn kjörna á þing í alþingiskosningunum 2013 en samkvæmt skoðanakönnun Gallup sem birt var í gær fengi flokkurinn 12 menn kjörna á þing.
Sjálfstæðisflokkurinn fékk 19 þingmenn árið 2013 og samkvæmt Gallup fær Sjálfstæðisflokkurinn 19 þingmenn einnig nú.
Gott gengi Pírata í skoðanakönnunum er umfjöllunarefni allra fjölmiðla sem fjalla um kosningarnar enda flokkurinn stofnaður árið 2009 af hópi fólks sem var á móti ríkjandi skipulagi.
AFP-fréttastofan hefur eftir Ólafi Harðarsyni stjórnmálafræðiprófessor að vinsældir Pírata megi rekja til reiði almennings í kjölfar hrunsins árið 2008 þegar þrír helstu bankar landsins urðu gjaldþrota og efnahagskreppan reið yfir.
Flestir þeirra fjölmiðla sem blaðamaður mbl.is renndi yfir í morgun voru með fréttir af þingkosningunum á Íslandi á forsíðu og margir með hana sem efstu eða næstefstu frétt. Alls staðar eru það Píratar og Panamaskjölin sem eru í fyrirsögn eða inngangi fréttanna.
Fyrirsögn Politiken er: Det skete på 10 år i Island: Et boom, et krak og et skattely eða Þetta gerðist á tíu árum á Ísland: Uppsveifla, hrun og skattaundanskot.