Fjarðarpósturinn hefur tilkynnt flokkum og listum sem bjóða fram í Hafnarfirði í komandi sveitarstjórnarkosningum að aðsendar greinar frá þeim framboðum sem auglýsa í blaðinu gangi fyrir.
Í umfjöllun um mál þetta í Morgunblaðinu í dag segir Olga Björt Þórðardóttir ritstjóri að ekki hafi reynt á þetta ennþá; allar greinar hafi fengist birtar sem borist hafi, bæði í blaði og á vefsíðu Fjarðarpóstsins.
Ákveðið hafi verið að hafa einhverja viðmiðun á birtingum í blaðinu, þar sem fjöldi greina berist gjarnan þegar nær dregur kosningum. Að sögn Olgu hefur Fjarðarpósturinn ekki gripið til þessa úrræðis áður.