Ákveða á morgun hvort talið verði aftur

Áður hafði verið ákveðið að ekki yrði talið aftur.
Áður hafði verið ákveðið að ekki yrði talið aftur. mbl.is

Borist hefur beiðni um endurtalningu í Suðurkjördæmi. Þetta staðfestir Þórir Haraldsson, formaður yfir­kjör­stjórn­ar Suður­kjör­dæm­is, í samtali við mbl.is en áður hafði verið ákveðið að ekki yrði talið aftur.

„Þetta er beiðni um endurtalningu frá umboðsmanni Vinstri grænna og við munum funda um hana eftir hádegi á morgun,“ segir Þórir.

Hversu langur fundurinn verður segir hann ekki vita. „Það verður bara að koma í ljós á morgun.“

Fyrr í kvöld var greint frá því að eftir endurtalningu í Norðvesturkjördæmi verði breyting á tíu þingmönnum sem ýmist mældust inni eða úti eftir að lokatölur birtust í morgun. Endurtalning í Suðurkjördæmi gæti því stokkað kapalinn upp á nýtt.

mbl.is