Ríkisstjórnin heldur velli og vel það eftir að fyrstu tölur úr öllum kjördæmum hafa verið birtar. Ríkisstjórnarflokkarnir þrír mælast nú með 39 þingmenni inni.
Sjálfstæðisflokkurinn hefur fengið alls 23,9% atkvæða á landinu öllu og er sem stendur langstærstur allra flokka. Næststærstur er Framsóknarflokkurinn með 14,8% atkvæða og þar á eftir koma Vinstri græn með 14,1% atkvæða. Samfylking er sem stendur stærstur stjórnarandstöðuflokkanna með 11,2% talda atkvæða á landinu öllu.
Í Suðvesturkjördæmi fær Sjálfstæðisflokkurinn 36,8% atkvæða eftir að fyrstu tölur hafa verið birtar og bætir flokkurinn við sig manni í kjördæminu. Vinstri græn fá tvo menn inn á þing með 13,7% atkvæða og Framsóknarflokkurinn einn með 12% atkvæða. Flokkur fólksins, Viðreisn og Píratar ná manni inn hver og Samfylking fær jöfnunarsæti. Aðrir flokkar ná ekki inn þingmanni í kjördæminu sem stendur.
Í Reykjavíkurkjördæmi suður fær Sjálfstæðisflokkurinn 22,9% atkvæða og þannig tvo þingmenn. Vinstri græn fær tvo þingmenn inn með 15,3% atkvæða og Framsóknarflokkurinn nær manni inn. Samfylking nær tveimur önnum inn með jöfnunarsæti rétt eins og Píratar. Viðreisn og Píratar ná manni inn hvor.
Í Reykjavíkurkjördæmi norður fær Sjálfstæðisflokkurinn 20,9% atkvæða og tvo þingmenn. Vinstri græn fær 16,6% atkvæða og þrjá þingmenn með jöfnunarsæti. Samfylking fær einn þingmann og Framsókn sömuleiðis, en Framsóknarflokkurinn nærri tvöfaldar fylgi sitt í kjördæminu frá því í kosningunum 2017. Píratar fá tvo þingmenn með jöfnunarsæti og Flokkur fólksins og Viðreisn einn hvor.
Í Norðvesturkjördæmi fær Sjálfstæðisflokkurinn 24,1% atkvæða eftir að fyrstu tölur hafa verið birtar. Framsóknarflokkurinn fær 23,3% atkvæða, Vinstri græn fá 11,1% atkvæða og Flokkur fólksins 10%. Þá myndi Samfylkingin fá einn mann inn á þing með 8,7% atkvæða en aðrir flokkar ná ekki inn á þing sem stendur, fyrir utan Viðreisn sem fengi jöfnunarsæti.
Í Norðausturkjördæmi er Framsóknarflokkurinn stærstur eftir að fyrstu tölur hafa verið birtar með 22,2% atkvæða. Sjálfstæðisflokkurinn heldur báðum sínum þingmönnum með 19,5% atkvæða. Samfylkingin mælist með tvo menn inni með 15,1% atkvæða og Vinstri græn og Flokkur fólksins fá einn mann hvor. Sigmundur Davíð Gunnlaugsson, formaður Miðflokksins, kemst ekki inn á þing samkvæmt fyrstu tölum. Viðreisn nær manni inn með jöfnunarsæti.
Í Suðurkjördæmi fær Sjálfstæðisflokkurinn 26,3% atkvæða eftir að fyrstu tölur hafa verið birtar. Framsóknarflokkurinn fær 21,7% atkvæða. Flokkur fólksins, Samfylkingin og Vinstri græn fá einn þingmann hver og Píratar ná manni inn með jöfnunarsæti. Sjálfstæðisflokkurinn og Framsóknarflokkurinn fá þrjá þingmenn hvor.