Innlent | Kosningar | mbl | 27.9.2021 | 11:42

„Búinn að vera rússíbani“

Jódís Skúladóttir. Ljósmynd/Aðsend

Jódís Skúladóttir, sem var uppbótarþingmaður Vinstri grænna í Norðausturkjördæmi í alþingiskosningunum, vonar að möguleg endurtalning í Suðurkjördæmi hafi ekki áhrif á stöðu sína sem nýr þingmaður flokksins.

„Er á meðan er,“ segir hún. „Ég var nokkuð örugg varðandi þessar breytingar í Norðvesturkjördæmi sem höfðu áhrif á Suðurkjördæmi en það er spurning hvað gerist ef talið verður aftur í Suður.“

Frétt af mbl.is

Líklegt að komi til endurtalningar í Suðurkjördæmi

„Ótrúlega óheppilegt“

Hún segir það „ótrúlega óheppilegt“ að staðan sé eins og hún er núna varðandi endurtalninguna. „Fólk er komið inn og jafnvel búið að mæta á fundi en síðan fer af stað einhver halarófa þegar þetta kemur upp,“ segir Jódís, sem er lögfræðingur úr Fellabæ.

Jódís Skúladóttir ásamt Katrínu Jakobsdóttur forsætisráðherra. Ljósmynd/Aðsend

Aðeins sjö atkvæði vantar upp á að Hólmfríður Árnadóttur, félagi Jódísar í VG, verði kjördæmakjörin í Suðurkjördæmi, að sögn Jódísar.

„Þetta er búinn að vera rússíbani. Ég hef staðið fyrir ákveðnum málefnum sem ég held að sé mikilvægt að halda á lofti. Ég held að það sé mikill styrkur í því, sérstaklega fyrir mitt kjördæmi, að ég verði inni, til að standa vörð um mín málefni,“ greinir hún frá og nefnir þar til sögunnar umhverfis- og loftslagsmál, jafnréttismál, samgöngumál og byggðamál.

Frétt af mbl.is

Konur ekki lengur í meirihluta eftir endurtalningu

Ekki inni fyrr en klukkan 9

Spurð út í kosninganóttina segir hún að strax í byrjun hafi verið ljóst að landslagið yrði öðruvísi en spár sögðu til um. Spennan hafi verið gríðarlega mikil og hún hafi ekki verið inni fyrr en klukkan rúmlega 9 um morguninn. Svefn kom því ekki til greina fyrr en niðurstaðan lá ljós fyrir.

Frá kosningavöku Vinstri grænna. Katrín Jakobsdóttir forsætisráðherra fylgist spennt með gangi mála. mbl.is/Kristinn Magnússon

Jódís kveðst að vonum spennt fyrir því að starfa á Alþingi. Hún hefur setið í sveitarstjórn í Múlaþingi í eitt ár og fundið sig mjög vel á pólitíska vettvangnum.

Innt eftir næstu skrefum segir hún mörg verkefni framundan. Þingflokksfundur var haldinn í gær þar sem farið var yfir stöðuna, enda þurfi að mynda starfhæfa ríkisstjórn.