Samfylking og Sjálfstæðisflokkur hafa komist að samkomulagi um myndun nýs meirihluta í bæjarstjórn Akraneskaupstaðar kjörtímabilið 2022 – 2026.
Málefnasamningur meirihlutans hefur verið samþykktur en í inngangi hans segir að leitast verði við að eiga gott samstarf við alla flokka í bæjarstjórn og að stjórnsýslan snúist um að veita íbúunum góða þjónustu með hagsmuni þeirra að leiðarljósi. Lögð verður áhersla á gott samstarf við íbúa og áframhaldandi uppbyggingu og þróun á virku íbúalýðræði. Áfram verður unnið að því að styrkja fjárhagsstöðu bæjarsjóðs, að því er segir í tilkynningu.
Líf Lárusdóttir verður formaður bæjarráðs, Valgarður Lyngdal Jónsson forseti bæjarstjórnar og Sævar Freyr Þráinsson verður áfram bæjarstjóri.
Samfylkingin mun fara með formennsku í velferðar- og mannréttindaráði og mennta- og menningarráði og Sjálfstæðisflokkurinn verður með formennsku í skipulags- og umhverfisráði.