„Við færum lífsgæði til fólks“

Hlín Benediktsdóttir, forstöðumaður verkundirbúnings og hönnunar hjá Landsneti, segir mikilvægt að verkefni Landsnets fái framgang til að við getum átt rafvædda framtíð í takt við þarfir samfélagsins. 

„Landsnet sér um flutningskerfi raforku á Íslandi. Við erum þjónustufyrirtæki í eigu þjóðarinnar og kjarninn í framtíðarsýn okkar er rafvædd framtíð í takt við þarfir samfélagsins. Við höfum veigamiklu hlutverki að gegna að viðhalda og reka eina af helstu grunnstoðum nútímasamfélags sem felst í flutningskerfi raforku,“ segir Hlín Benediktsdóttir, forstöðumaður verkundirbúnings og hönnunar hjá Landsneti.

„Stærstu verkefnin í undirbúningi núna eru Blöndulína 3 og Holtavörðuheiðarlína 1 og 3. Öll þessi verkefni eru verkefni í nýrri kynslóð byggðalínu sem tengja virkjanir í suðri við virkjanir í austri, með tengingum frá Hvalfirði til Akureyrar. Við tölum um að loka hringnum með þessum verkefnum,“ segir Hlín og bætir við:

„Við færum lífsgæði til fólks sem þýðir að til eru staðir á landinu sem ekki hafa tækifæri til að afla orku en með því að styrkja kerfin eins og við erum að gera þá flytjum við orku um allt land og færum einnig tækifærin í hérað. Þegar við erum að tengja landið þá hefur það bæði áhrif á nærsamfélagið en einnig þjóðina í heild sinni. Við þurfum oft að fara yfir landsvæði sem eru í eigu einkaaðila þannig að við þurfum að vera í góðu samtali og að mynda sem mesta sátt um verkefnin. Það þarf að gera aðalskipulagsbreytingar á stöðunum þar sem við förum með raflínurnar í gegn og stundum hjá fleiri en einu sveitarfélagi í einu,“ segir hún.

Vilja búa til spennandi tækifæri í landinu

Hversu margar jarðir fer hefðbundið verkefni í gegnum?

„Stundum allt upp í tæplega 100 jarðir,“ segir Hlín og bætir við að markmiðið sé alltaf að reyna að fá sem breiðasta sátt um hverja línu en það taki langan tíma í dag. „Ég vildi óska þess að almenningur myndi sjá fleiri tækifæri í flutningskerfinu og að skilningur væri almennt orðinn meiri í samfélaginu en hann er í dag um hvað Landsnet er að gera fyrir og gefa landsmönnum.“

Hlín segir mikilvægt að til verði spennandi atvinnutækifæri í landinu en til þess að svo geti orðið þarf rafmagn um allar koppagrundir. „Við viljum að fólk búi á landsbyggðinni og við viljum búa til spennandi tækifæri í landinu svo allir þeir sem mennta sig hérlendis og erlendis geti komið aftur heim í spennandi störf. Það skiptir máli að eiga orku fyrir spennandi fyrirtæki sem vilja hafa starfsemina sína á Íslandi og þess vegna erum við að vinna mjög þarft samfélagslegt verkefni sem við þurfum öll að standa á bak við.“

„Flutningskerfið eins grænt og það getur orðið“

Landsnet er fyrirtæki sem sérfræðingar horfa á sem vænlegan vinnustað, þá sérstaklega þeir sem hafa áhuga á uppbyggingu innviða að sögn Hlínar. „Við erum að vinna vinnu sem skilar svona miklu fyrir samfélagið og er allt við störfin okkar alveg einstaklega skemmtilegt þó að maður sé ekki sjálfur að leggja línurnar og stinga í samband,“ segir hún.

Landsnet þarf á samfélaginu að halda og ekki síður stjórnmálamönnum að sögn Hlínar. „Til að leiða áfram breytingar á leyfisferlinu og létta á þeim. Því þetta eru svo þjóðhagslega mikilvægir innviðir sem skipta okkur öll máli. Lokamarkmiðið er að búa til sterkara kerfi og geta nýtt þær virkjanir sem nú þegar eru og komandi virkjanir einnig.

Við erum hins vegar langt á eftir með verkefnið að tengja landið. Flutningskerfið okkar er eins grænt og það getur orðið og flytjum við einvörðungu græna orku. Ef við ímyndum okkur flutningskerfin okkar líkt og vegakerfið, þá erum við með góðan veg á milli Fljótdals til Akureyrar en þegar við komum að Akureyri koma þungatakmarkanir á orkuna okkar og við getum ekki flutt eins mikla orku frá Akureyri til Hvalfjarðar, og það sama gerist á Suðurlandi. Ef við förum með orkuna eftir þjóðveginum, frá virkjunum á Suðurlandi og upp í Hvalfjörð koma þungatakmarkanir á orkuna og við getum ekki flutt orkuna til baka. Í rauninni er eins og við séum að búa til nýjan þjóðveg þarna á milli, í þremur pörtum.“

Mikilvægt að útskýra verkefnin fyrir landsmönnum

Hvað hindrar verkefnin?

„Það er langoftast þannig að fólk vill ekki hafa rafmagnslínur nálægt sér, og yfirleitt vegna sjónmengunar. Það hafa vaknað spurningar varðandi verkefnin og byggist samtalið við hagaðila mikið á því að við erum að útskýra komandi framkvæmdir, hlusta á hagaðila og heyra hvaða upplýsingar við getum veitt. Umhverfismatið sem við gerum fyrir allar loftlínur útskýrir mjög stóran hluta hvað viðkemur verkefnum okkar og umhverfisáhrifum þeirra. Það skiptir svo miklu máli að við komum þessum upplýsingum eins vel frá okkur og við getum svo almenningur sjái og skilji ástæðuna að baki verkefnanna.

Við viljum öll það sama þegar kemur að framtíðinni, að Ísland verði land tækifæranna og að við höfum aðgang að tækni og nýsköpun og atvinnu í samkeppnishæfu umhverfi. Það er svo hlutverk fyrirtækja eins og okkar að greiða þennan veg. Það er mín ósk að almenningur kynni sér verkefnin okkar og standi á bak við okkur í náinni framtíð,“ segir Hlín Benediktsdóttir að lokum.

• Blogga um frétt