Klakinn brýtur sér leið út í hafið

INNLENT  | 4. september | 16:05 
Þegar horft er yfir Jökulsárlón sést vel hvernig ísjakarnir úr Breiðamerkurjökli hrannast upp við brúna yfir jökulána sem liggur frá lóninu út á haf. Eins og væn biðröð að séríslenskum hætti.

Þegar horft er yfir Jökulsárlón sést vel hvernig ísjakarnir úr Breiðamerkurjökli hrannast upp við brúna yfir 500 metra langa jökulána sem liggur frá lóninu út á haf. Þeir minna helsta á væna biðröð myndaða með séríslenskum hætti í hverfi 101 um helgar áður en kórónuveiran setti strik í reikninginn. 

Það er vel skiljanlegt að staðurinn hafi heillað í Hollywood en atriði í hvorki meira né minna en tveimur James Bond-myndum hafa verið tekin upp á svæðinu; hinni stórgóðu A View To A Kill og hinni afleitu Die Another Day, einni af þessum með náunganum í Mamma Mia! Þá var svæðið notað í Tomb Raider-mynd, hafi einhver séð hana, og líka í kvikmynd um dimmraddaðan Leðurblökumann.

Í þessu myndskeiði er ekki að finna neinar byssur og í því er ekki einn bílaeltingaleikur. Bara Jökulsárlón í allri sinni dýrð á sólríkum sumardegi í júlí.

Myndskeiðið er tekið með dróna en notkun þeirra innan Vatnajökulsþjóðgarðar er háð því að fá leyfi hjá þjóðgarðsverði. 

Þættir