Þingið samþykkir Barrett

ERLENT  | 27. október | 5:55 
Öldungadeild Bandaríkjaþings samþykkti nú í kvöld tilnefningu Amy Coney Barrett í embætti hæstaréttardómara. Verður hún þar með sjötti íhaldsmaðurinn í dómnum.

Öldungadeild Bandaríkjaþings samþykkti nú í kvöld tilnefningu Amy Coney Barrett í embætti hæstaréttardómara.

Donald Trump Bandaríkjaforseti tilnefndi Barrett til starfsins í síðasta mánuði eftir að Ruth Bader Ginsburg dómari féll frá, 87 ára að aldri. Ferlið gekk nokkuð hratt fyrir sig enda repúblikanar ólmir í að skipa dómara áður en forsetakosningar fara fram í landinu í næstu viku.

https://www.mbl.is/frettir/erlent/2020/09/18/ruth_bader_ginsburg_latin/

Alls greiddi 51 þingmaður Repúblikanaflokksins atkvæði með tilnefningunni en allir 48 þingmenn demókrata, auk repúblikanans Susan Collins frá Maine, greiddu atkvæði gegn henni. Er þetta í fyrsta sinn í 151 ár sem þingið samþykkir hæstaréttardómara án atkvæðis nokkurs þingmanns minnihlutans.

Barrett er fimmta konan til að taka við embætti hæstaréttardómara en alls hafa 115 setið í dómnum frá því hann tók til starfa árið 1789.

https://www.mbl.is/frettir/erlent/2020/09/27/hver_er_amy_coney_barrett/

Sterkur meirihluti íhaldsmanna

Með skipaninni breytast valdahlutföll innan réttarins íhaldsmönnum í vil. Sex dómarar við réttinn hafa nú verið skipaðir af forsetum repúblikana en þrír af forsetum demókrata. Við upphaf forsetatíðar Trumps var staðan 5-4 íhaldsmönnum í vil.

Óttast frjálslyndir vestra að ýmsum réttindum á borð við hjónabönd samkynhneigðra, og réttinn til þungunarrofs kunni að stafa ógn af svo íhaldssömum hæstarétti, auk þess sem rétturinn sé vís til að verða þrándur í götu forseta og þings sem vilja íþyngja fyrirtækjum með hertum reglum í þágu umhverfisins.

https://www.mbl.is/frettir/erlent/2020/10/13/kom_ser_hja_spurningum_um_thungunarrof/ 

Demókratar hafa sakað repúblikana um hræsni fyrir að keyra tilnefninguna í gegn svo stuttu fyrir kosningar. Fyrir fjórum árum komu repúblikanar, sem höfðu þá sem nú meirihluta í öldungadeildinni, í veg fyr­ir að Barack Obama, þáver­andi Banda­ríkja­for­seti, fengi sínu fram­gengt þegar hann til­nefndi Merrick Garland í laust sæti hæsta­rétt­ar­dóm­ara.

Voru rök repúblikana þau að of stutt væri til kosninga og að bíða skyldi fram yfir þær til að það skyldi koma í hlut sigurvegara forsetakosninganna að skipa í laust sæti.

Repúblikanar hafa hins vegar haldið því fram að aðrar reglur gildi þegar flokkur forsetans hefur einnig þingmeirihluta.

 

Þættir