Saknæmt þungunarrof eða slys?

ERLENT  | 9. júní | 7:32 
Sara Rogel er 28 ára gömul og hefur setið á bak við lás og slá í tæp níu ár en hún var tvítug dæmd í 30 ára fangelsi fyrir ólöglegt þungunarrof.

Sara Rogel er 28 ára gömul og hefur setið á bak við lás og slá í tæp níu ár en hún var tvítug dæmd í 30 ára fangelsi fyrir ólöglegt þungunarrof. 

Rogel, sem býr í El Salvador, var látin laus í gær og beið fjölskylda hennar eftir henni fyrir utan Zacatecoluca-kvennafangelsið ásamt lögfræðingi hennar, Karla Vaquerano, sem starfar með samtökunum ACDATEE sem berjast fyrir réttindum kvenna þegar kemur að þungunarrofi. 

 

Sara Rogel var 20 ára gömul þegar hún rann og datt þegar hún var að þvo þvott. Á þessum tíma var hún í háskólanámi og komin átta mánuði á leið. Fjölskylda Söru fann hana meðvitundarlausa og var hún flutt með hraði á sjúkrahús. Þar var hún handtekin grunuð um að hafa farið í þungunarrof. 

Þungunarrof eru bönnuð og saknæm í öllum tilvikum í El Salvador, landi þar sem kaþólska kirkjan er sterk og samfélagið íhaldssamt. Refsingin fyrir slíkan glæp er frá átta ára fangelsi upp í 50 ára fangelsi. 

Fyrir dómi var hún fundin sek um morð af ásettu ráði og dæmd í 30 ára fangelsi en lögmenn hennar fengu refsinguna síðar mildaða í 10 ára fangelsi. Samkvæmt því hefði hún átt að losna úr fangelsi í október 2022. 

Þar sem um reynslulausn er að ræða má Rogel ekki yfirgefa landið og er gert að sækja sér sálfræðiaðstoð.

„Hún var svipt frelsi í næstum því níu ár. Dómur sem við teljum að sé óréttlátur,“ segir Vaquerano í samtali við AFP-fréttastofuna.

Í frétt El País kemur fram að dómari í Cojutepeque hafi fyrirskipað lausn Rogels fyrir viku á grundvelli þess að hún hefði afplánað nánast alla sína refsingu og hún væri ekki ógn við samfélagið. Gleði fjölskyldunnar var aftur á móti skamvinn því saksóknari tilkynnti að hann myndi áfrýja niðurstöðunni. „Við höfum beðið í tíu ár. Tíu ár án hennar,“ segir Ángel Rogel, þar sem hann stóð fyrir utan réttarsalinn ásamt stuðningsmönnum Söru dóttur hans, fyrir rúmri viku. 

Sara Rogel fæddist í smábænum Santa Cruz Analquito í Cuscatlán-héraði. Í október árið 2012 rann hún við þvotta og missti ófætt barn sitt. „Þetta var meðganga á lokastigum. Þetta var barn sem beðið var eftir og velkomið í heiminn,“ segir Morena Herrera, forseti samtaka sem berjast fyrir afglæpavæðingu þungunarrofs. 

„Vegna slyssins missti hún barnið sitt og mikið blóð þannig að það þurfti að flytja hana á sjúkrahús. Þar var hún sökuð um að hafa farið í þungunarrof og síðar dæmd í 30 ára fangelsi fyrir morð af yfirlögðu ráði,“ segir Herrera.

Krufning leiddi í ljós að fóstrið hafði fengið höfuðáverka sem dómarar töldu hafa verið veittir af ráðnum hug. 

Reuters-fréttastofan greinir frá því að ríkissaksóknari hafi haft viku til að áfrýja en þar sem það var ekki gert hafi Sara Rogel verið látin laus í gær. 

Þættir