Facebook verður Meta

TÆKNI  | 29. október | 14:11 
Samskiptarisinn Facebook hefur ákveðið að skipta um nafn og mun hér eftir ganga undir heitinu Meta.

Samskiptarisinn Facebook hefur ákveðið að skipta um nafn og mun hér eftir ganga undir heitinu Meta.

Nafnbreytingin nær einungis til móðurfyrirtækis Facebook en samskiptamiðillinn Facebook og dótturfyrirtæki á borð við Instagram og Whatsapp munu halda sínum heitum.

Facebook segir þá hið nýja nafn gefa skýrari mynd af því sem fyrirtækið mun fást við en á meðal þess verður innkoma á ný svið á borð við sýndarveruleika, að því er fram kemur í frétt BBC.

 

Zuckerberg spenntur fyrir sýndarveruleika

„Ég kynni það með stolti að fyrirtækið okkar mun hér eftir ganga undir heitinu Meta,“ segir Mark Zuckerberg, forstjóri Facebook, í kynningarmyndbandi sem The Recount birti í dag. 

„Við höfum í grunninn sömu markmið; að leiða fólk saman. Öll okkar öpp og fyrirtæki munu halda sínum nöfnum, og við erum enn fyrirtækið sem hannar tækni utan um fólk. En núna tökumst við á við nýtt verkefni – að láta sýndarveruleikann verða að veruleika.“

 

Nafnbreytingin komi í kjölfar neikvæðrar umfjöllunar

Segir í frétt BBC að nafnbreytingin komi í kjölfar fjölda neikvæðra frásagna um Facebook, sem byggðar eru á gögnum sem láku frá fyrrverandi starfsmanni fyrirtækisins, en þar var fyrirtækið meðal annars sakað um að meta fjármuni ofar öryggi.

Google fór í gegnum svipað ferli og breytti heiti móðurfyrirtækisins í Alphabet en nafnið hefur ekki náð að festa sig almennilega í sessi.

Þættir