Sjö stiga frost var úti og heiðskírt þegar blaðamaður mbl.is og myndatökumaður keyrðu að Keflavíkurhöfn þar sem áhöfnin á varðskipinu Freyju var að undirbúa fjöldabjörgun fólks úr sjó, ásamt félögum úr Slysavarnafélaginu Landsbjörg.

Tilefni æfingarinnar var meðal annars ráðstefna sem Landhelgisgæslan, Samtök útgerða skemmtiferðaskipa á norðurslóðum (AECO), og Leitar- og björgunarmiðstöðin í Norður-Noregi efndu til í Reykjanesbæ.

Þar til umfjöllunar voru björgunarmál tengd siglingum skemmtiferðaskipa á norðurslóðum. Stóðu ráðstefnugestir við höfnina og fylgdust með er æfingin fór fram.

Undirrituð stóð þó ekki hjá heldur skellti sér í gallann og út í sjó. Galvaskir áhafnarmeðlimir sáu svo um að koma blaðamanni aftur um borð í björgunarbát og þaðan í varðskipið. Afraksturinn má sjá á meðfylgjandi myndskeiði.