„Mig langar ekki með barnið mitt þarna inn“

INNLENT  | 4. október | 16:29 
Halla Gunnarsdóttir, fráfarandi framkvæmdastjóri ASÍ, segir ekki skrýtið að fólk skilji ekki um hvað átökin í ASÍ snúast. „Ég hef ekki skilið það. Ég hef samt verið inni á öllum þessum fundum og inni í þessum kjarna og þetta hefur stundum verið einhver allsherjar þeytivinda og þegar maður stígur út úr henni veit maður varla hvað maður heitir sjálfur,“ segir Halla.

Halla Gunnarsdóttir, fráfarandi framkvæmdastjóri ASÍ, segir ekki skrýtið að fólk skilji ekki um hvað átökin í ASÍ snúast. „Ég hef ekki skilið það. Ég hef samt verið inni á öllum þessum fundum og inni í þessum kjarna og þetta hefur stundum verið einhver allsherjar þeytivinda og þegar maður stígur út úr henni veit maður varla hvað maður heitir sjálfur,“ segir Halla. 

https://www.mbl.is/frettir/innlent/2022/09/22/halla_segir_upp_sem_framkvaemdastjori_asi/

„Maður missir algjörlega sjónir. Það finnst mér vera vegna þess að þetta snýst um völd og yfirráð og það er alltaf verið að búa til myndir og hugmyndir – til dæmis að það sé verið að rífast um Salek, sem er ekki á dagskrá – til þess að búa til andstæðinga til að styrkja valdastöðu þína.“

Halla er gestur Karítasar Ríkharðsdóttur í Dagmálum þar sem hún ræðir átökin í ASÍ og ástæður þess að hún sagði starfi sínu lausu, ferilinn, kjaramál og margt fleira. 

https://www.mbl.is/mogginn/dagmal/thjodmalin/232274/

Áttaði sig eftir verslunarmannahelgi

Halla segir átökin hafa verið mjög hatrömm.

„Ég áttaði mig ekki á því hvað þetta er ruglað fyrr en eftir verslunarmannahelgi, þegar íslenskt samfélag er að fara af stað að nýju, og ég hugsa að ég ætti kannski að fara að mæta á miðstjórnarfundi – og ég er náttúrlega með pínulítið barn. Þegar ég var með eldri stelpuna mína fór ég með hana á alla fundi sem mér datt í hug. En svo hugsaði ég; mig langar ekki með barnið mitt þarna inn,“ segir Halla.

Bætir hún við að hún hafi haldið á þriggja mánaða barninu sínu og ekki getað hugsað sér að fara með það inn í umhverfið sem fundarsetan bauð upp á.

„Þá opnuðust augun mín rosalega mikið fyrir því inni í hvernig umhverfi ég var búin að sitja.“