Sala á glóðarperum væntanlega bönnuð í Ontario

Laurel Broten, umhverfisráðherra Ontario, greinir fréttamönnum frá væntanlegu glóðarperubanni.
Laurel Broten, umhverfisráðherra Ontario, greinir fréttamönnum frá væntanlegu glóðarperubanni. Reuters

Sala á hefðbundnum ljósaperum, eða glóðarperum, verður bönnuð í Ontario-fylki í Kanada frá og með 2012, og er það liður í víðtækum aðgerðum til að draga úr orkunotkun, að því er yfirvöld í fylkinu greindu frá í vikunni. Með því að koma í veg fyrir notkun glóðarpera á að draga úr raforkueftirspurn um sex milljónir megavatt-stunda á ári.

Þessi orka sem sparast dugar fyrir 600.000 heimili á ári. Stefnt er að því að flúrperur, sem nota um 75% minni orku en glóðarperur, komi í staðinn fyrir allar þær 87 milljónir glóðarpera sem eru í notkun í Ontario.

Fylkisstjórnin mun héðan í frá einungis kaupa sparperur í opinberar byggingar. Laurel Broten, umhverfismálaráðherra fylkisins, sagði bann við glóðarperum draga úr losun gróðurhúsalofttegunda sem samsvari því að 250.000 bílar væru teknir úr umferð.

Ontario er fjölmennasta fylkið í Kanada, en þar eru m.a. borgirnar Toronto og Ottawa. Með þessum aðgerðum fetar fylkisstjórnin í fótspor ástralskra stjórnvalda sem tilkynntu fyrir skömmu að þar í landi yrðu glóðarperur bannaðar frá og með 2010, og var Ástralía fyrsta landið í heiminum sem ákvað slíkt bann.

Glóðarperur hafa lítið breyst síðan Edison fann þær upp fyrir 125 árum. Aðeins um fimm prósent orkunnar sem þær þurfa nýtist til birtugjafar.

mbl.is

Bloggað um fréttina