Smástirni á stærð við vörubíl

Smástirni á stærð við vörubíl þaut fram hjá jörðu í dag. Þegar það var næst jörðu var það fjórum sinnum nær en tunglið. Fram kemur á vef Reuters að vitund manna á hættunni á því að smástirni geti rekist á jörðina með alvarlegum afleiðingum sé að aukast.

Bandaríska geimvísindastofnunin NASA segir að menn hafi uppgötvað smástirnið, sem ber nafnið 2013 LR6, um degi áður en það varð næst jörðu, en það gerðist kl. 4:42 í nótt að íslenskum tíma. Þá varð það um 104.000 km frá Suðurhöfum, suður af áströlsku eyjunni Tasmaníu.

Engin ógn stafaði af smástirninu sem var um 10 metrar í þvermál.

Fyrir einni viku fór annað smástirni, sem var með eigið tungl í eftirdragi, fram hjá jörðu. Það var mun stærra, eða um 2,7 km breitt. Þá var það mun fjær jörðu, eða um 5,8 milljón km.

Þann 15. febrúar sl. varð hins vegar töluvert tjón og yfir 1.500 slösuðust þegar lítið smástirni sprakk yfir Chelyabinsk í Rússlandi. Sama dag fór annað ótengt smástirni fram hjá jörðu, en næst mældist það í um 27.680 km fjarlægð. Það er mun nær en fjarskiptahnettir sem eru á sporbaug um bláa hnöttinn.

• 1 blogg um fréttina

Bloggað um fréttina

• Magnús Jónsson: Stór vörubíl??