D-vítamín „gæti komið í veg fyrir kvef og flensu“

D-vítamín gæti hlíft meira en 3 milljónum Breta við kvefi og flensu ár hvert samkvæmt nýrri rannsókn. Vítamínið er mikilvægt fyrir beinheilsu en hefur einnig hlutverki að gegna við eflingu ónæmiskerfisins.

Niðurstöður rannsóknarinnar voru birtar í vísindatímaritinu British Medical Journal. Í henni er því haldið fram að vítamínbæta ætti matvæli.

Heilbrigðisstofnun Englands, Public Health England (PHE), segir að niðurstöðurnar séu ekki afgerandi hvað varðar vörnina gegn sýkingum, en mælir engu að síður með vítamíninntöku. Vítamínin ætti að taka til að bæta bein- og vöðvaheilsu. 

Ónæmiskerfið notar D-vítamín til að vígbúast gegn bakteríum og vírusum. Þar sem vítamínið verður til í húðinni þegar sólin skín þjást margir af skorti á því yfir vetrarmánuðina.

Niðurstöður prófana á inntöku vítamína til að koma í veg fyrir sýkingar hafa ekki verið á einn veg. Þeir sem stóðu að rannsókninni nú notuðu gögn um 11.321 mann úr 25 ólíkum rannsóknum til að komast að sinni niðurstöðu.

Rannsóknin var leidd af vísindamönnum við Queen Mary University of London (QMUL). Niðurstaða þeirra var sú að 1 af hverjum 33 sem tækju D-vítamín gætu komist hjá sýkingum, s.s. kvefi og flensu, með inntökunni.

Virkni vítamínanna verður meiri ef þau eru tekin daglega eða vikulega, í stað þess að taka stóra skammta mánaðarlega. 

Frétt BBC um rannsóknina.

• Blogga um frétt