Netárásir eru atvinnugrein og fara vaxandi

Landsmenn kunna að hafa fundið fyrir auknu áreiti svindltölvupósta, sem stundum eru kallaðir Nígeríubréf, þar sem reynt er að sannfæra viðtakanda um að hans bíði umbun í formi peninga fari hann eftir fyrirmælum póstanna.

Blaðamaður Morgunblaðsins ræddi við Theódór Ragnar Gíslason, tæknistjóra tölvuöryggisfyrirtækisins Syndis, um málið. Theódór segir að þó hann hafi ekki formlega mælingu á slíkum póstum þá bendi margt til að þeir séu að aukast.

„Við sem einkafyrirtæki erum að fá fleiri svona hluti inn á okkar borð,“ segir hann í umfjöllun um mál þetta í blaðinu og bendir á að meinfýsnari tölvuárásir færist einnig í aukana en tölvupóstarnir séu einfaldasta útgáfa netárása.