Lyf hafa áhrif á alvarlegt þunglyndi

Niðurstaðan var einnig sú að mikill munur er á virkni ...
Niðurstaðan var einnig sú að mikill munur er á virkni lyfjanna sem prófuð voru. mbl.is/Kristinn Ingvarsson

Vísindamenn segjast hafa komist að niðurstöðu í einu stærsta deilumáli læknavísindanna síðustu árin: Þunglyndislyf virka.

Þetta er niðurstaða gríðarstórrar rannsóknar sem birt hefur verið í vísindatímaritinu Lancet. Í henni var unnið með gögn úr 522 meðferðarprófunum sem 116.477 einstaklingar tóku þátt í. Niðurstaða rannsóknarinnar er sú að 21 algengt þunglyndislyf hafði var áhrifameira við að draga úr þunglyndiseinkennum heldur en lyfleysa sem hluta hópsins var gefin.

Niðurstaðan var einnig sú að mikill munur er á virkni lyfjanna sem prófuð voru.

Draga vísindamennirnir þá ályktun að lyfin gætu gagnast mun fleirum. 

Samtök geðlækna í Bretlandi segja að rannsóknin bindi enda á deilur um virkni þunglyndislyfja. 

Í rannsókninni var sjónum beint að þeim sem þjást af alvarlegu þunglyndi. Auk gagna sem notuð voru við prófanirnar 522 var nýrra gagna aflað. 

Öll lyfin reyndust betri en lyfleysan en munur var þó milli lyfja á þeim árangri sem náðist við að bæta líðan fólks. 

„Við komumst að því að þau þunglyndislyf sem mest eru notuð vinna á alvarlegu og mjög alvarlegu þunglyndi og ég held að það séu mjög góðar fréttir fyrir sjúklinga og lækna,“ hefur BBC eftir Andreu Cipriani sem starfar við Oxford-háskóla og er aðalhöfundur rannsóknarinnar.

mbl.is