Facebook hefur ekki átt sjö dagana sæla eftir að upp komst um að breska ráðgjafarfyrirtækið Cambridge Analytica hefði nýtt sér gögn um 50 milljónir facebooknotenda, m.a. í kosningabaráttu í Bandaríkjunum og Bretlandi. Facebook játaði mistök og sagði það á sína ábyrgð að vernda gögnin sem ráðgjafarfyrirtækið komst yfir.
Í gær birti vefurinn Buzzfeed minnisblað sem lekið var til miðilsins en minnisblaðið skrifaði einn af framkvæmdastjórum Facebook fyrir tveimur árum. Þar gefur Andrew „Boz“ Bosorth, einn af framkvæmdastjórum Facebook í innsta hring Marks Zuckerbergs, forstjóra Facebook, til kynna að samfélagsmiðillinn ætli að halda áfram að vaxa, sama hvað það kosti.
„Ljóti sannleikurinn er einfaldlega sá að við trúum svo innilega á tenginguna milli fólks að allt sem við gerum til að tengja fleira fólk saman, og oftar, er í raun og veru jákvætt,“ segir i minnisblaðinu sem Bosorth skrifaði.
Sagði hann að útkoman af bættri tengingu milli manna gæti sannarlega leitt til jákvæðra hluta, leitt til ástarsambanda eða jafnvel komið í veg fyrir sjálfsvíg. En afleiðingarnar geti líka verið neikvæðar, kostað einhvern lífið vegna neteineltis eða skapað vettvang til skipulagningar á hryðjuverkum.
„Ég er ekki sammála þessum skilaboðum í dag, og var það ekki heldur þegar ég skrifaði minnisblaðið,“ segir Bosworth í yfirlýsingu sem hann sendi AFP-fréttaveitunni vegna málsins. „Tilgangurinn með minnisblaðinu var að opna á þessa umræðu sem mér þótti þörf á, um hluti sem þörfnuðust meiri umræðu innan fyrirtækisins.“
Mark Zuckerberg sagði í samtali við AFP Bosworth vera mjög hæfileikaríkan leiðtoga sem væri óhræddur við að ögra, sem kemur fram t.d. í umræddu minnisblaði. „En þessu voru flestir hjá Facebook hjartanlega ósammála, þar á meðal ég. Við höfum aldrei trúað því að tilgangurinn helgi meðalið. Það er ekki nóg að tengja fólk saman, það þarf að tengja fólk betur saman,“ sagði Zuckerberg við AFP.