Íhuga sölubann á orkudrykkjum til barna

Ensk yfirvöld íhuga að banna sölu á orkudrykkjum til barna yngri en átján ára þar sem talið er að þeir ógni heilsu barna.

Mjög mikill sykur og koffín er í orkudrykkjum og hefur mikil drykkja þeirra verið tengd við offitu og önnur heilsufarsvandamál. Bann er nú til skoðunar hjá yfirvöldum í Englandi en stjórnvöld þar, í Skotlandi, á Norður-Írlandi og í Wales hafa heimild til þess að setja slíkt bann þrátt fyrir að það gildi ekki annars staðar í Bretlandi.

Í frétt BBC kemur fram að ungmenni í Bretlandi eru þau sem neyta einna mest af orkudrykkjum af ungmennum í Evrópu. Í mörgum tilvikum er meiri sykur og meira koffein í þeim en í hefðbundnum gosdrykkjum. 

Mikil neysla getur haft áhrif á tannheilsu, eykur hættu á offitu, getur valdið höfuðverk og svefnvanda, segir enn fremur í frétt BBC.

Kennarar segja að orkudrykkir hafi slæm áhrif á frammistöðu nemenda en ekki liggja gagnreyndar rannsóknir þar að baki. 

BBC

• Blogga um frétt