Falsfrétt um þekkta Íslendinga sem sagt er að hafi grætt ótrúlegar upphæðir á viðskiptum með rafmyntina bitcoin er í umferð á Facebook.
Fréttirnar koma af síðunni Heralded News, sem líkist mjög útlitli Viðskiptablaðsins en falska síðan kallast Viðskiðtabaðið. Þar er meðal annars falsfrétt um að Björgólfur Guðmundsson hafi komið í Kastljós þar sem hann hafi greint frá því hvernig hann græddi 250 milljarða króna eftir gjaldþrot.
Þórir Ingvarsson, lögreglufulltrúi lögreglu á höfuðborgarsvæðinu, segist hafa fengið ábendingar um þetta tiltekna mál. Vefurinn sé hins vegar vistaður erlendis og því sé ekki hægt að loka á hann.
„Við höfum ítrekað sagt að fólk eigi að gæta sín í viðskiptum og öllu slíku, sérstaklega þegar boðið er upp á fjárfestingarleiðir í gegnum svona auglýsingar. Við höfum í gegnum tíðina bent fólki á að kanna svona vel áður en það lætur peninga af hendi,“ segir Þórir og bætir við að fréttir af svona skjótfengnum gróða eigi alltaf að vekja upp grunsemdir.