Sveppir gætu bjargað býflugunum

Veirueyðandi efni í sveppum gæti komið býflugum heimsins til bjargar en útbreiddur býflugnadauði hefur valdið vísindamönnum miklum áhyggjum í nokkur ár. Það var smásalinn Paul Stamets sem fyrstur vakti athygli á mögulegri lækningu fyrir býflugur í sveppum. Mögulega verður hið virka efni notað á næsta ári í tilraun til að bjarga býflugunum.

Stamets greindi frá hugmynd sinni í Tuscaloosa News um helgina og hafa margir fjölmiðlar fjallað um hana síðan þá. Hann segist oft hafa séð býflugur reyna að næra sig á sveppunum hans. Hann segist hafa séð þær dreypa á dropum sem komu frá þeim. Hann fór svo að velta því fyrir sér hvort flugurnar væru að sækja í lækningu, ekki næringu. 

Í frétt Newsweek um málið segir að hrun í býflugnastofninum megi m.a. rekja til mítlafaraldurs sem geisað hafi frá því um 1980.

Varroa-mítlarnir geta sýkt býflugur með vírusum og þar með lagt heilu lendur þeirra í eyði. Bent hefur verið á að um þriðjungur allrar fæðuframleiðslu heimsins byggi á tilveru býflugna.

Steve Sheppard, prófessor við Washington-háskóla, hefur oftsinnis gert tilraunir með framúrstefnulegar aðferðir við að bjarga býflugnastofninum. Hann sá tækifæri í kenningu Stamets og vildi prófa hana.

Sheppard og teymi hans gerðu tilraunir á tveimur hópum býflugna. Báðir hóparnir höfðu komist í snertingu við varroa-mítlana. Annar hópurinn fékk sykur að éta með bætiefni úr sveppi. Hinn fékk aðeins sykur. Niðurstaðan var góð: Bætiefnið eyddi veikindum sem fylgdu sumum stofnum veirunnar.

Stamets hefur hannað búnað sem nær hinu læknandi efni úr sveppunum og vonast til að hann komi á markað árið 2019.

• Blogga um frétt