CeBIT-sýningin lögð af

Ákveðið hefur verið að hætta við áður stærstu tæknisýningu í heimi, CeBIT-tæknisýninguna í Hannover. Ákvörðunin er tekin í kjölfarið á því að gestum sýningarinnar hefur fækkað hratt undanfarin ár.

Skipuleggjendur sýningarinnar tilkynntu þetta í gær. Í tilkynningu þaðan kemur fram að fækkun gesta og fyrirtækja sem sækjast eftir plássi til að kynna vörur sínar á hátíðinni hafi fækkað það mikið að ekki borgi sig að halda hátíðina.

„CeBIT-sýningin verður ekki haldin í Þýskalandi í framtíðinni,“ sagði Onuora Ogbukagu, talsmaður Deutsche Messe AG sem séð hefur um hátíðina.

Sýningin var fyrir nokkrum árum talin mikilvægasta og stærsta tæknisýning í heiminum ár hvert en í upphafi 21. aldarinnar komu að jafnaði um 850.000 gestir til Hannover vegna hennar.

• Blogga um frétt