Fundu uppblásna plánetu

Hvað býr í næstu sólkerfum?
Hvað býr í næstu sólkerfum? Ljósynd/NASA

Nýuppgötvuð fjarpláneta, sem er í um 124 ljósára fjarlægð frá jörðu, er full af heitu lofti. Andrúmsloft hennar er útbólgið af helíum, rétt eins og uppblásin blaðra. 

Þetta er niðurstaða nýrrar rannsóknar sem CNN-fréttastofan greinir m.a. frá. 

Í frétt CNN segir að HAT-P-11b sé á stærð við Neptúnus og fjórum sinnum stærri en jörðin. Þar er gríðarlega heitt, um 550 stiga hiti enda er plánetan nokkuð nálægt sinni sólu. 

Þó að frumefnið helíum sé af skornum skammti á jörðinni er það næstalgengasta efni alheimsins á eftir vetni. Hvað fjarplánetuna varðar þá er helíum að yfirgefa lofthjúp hennar á milli þess sem það ferðast á ógnarhraða um yfirborð hennar, allt að 10 þúsund kílómetra hraða á klukkustund. Þetta er í fyrsta sinn sem vísindamenn geta staðfest losun helíums úr lofthjúp en rannsókn þeirra er birt í nýjasta hefti Science. Því myndar helíum nokkurs konar ský um plánetuna. 

Skýringin á því að HAT-P-11b er eins og útblásin blaðra er líklega sú að hún er mjög nærri sól síns sólkerfis.

Vísindamenn segjast nú fá skýrari mynd af hinu öfgafulla veðurfari sem ríkir á plánetum í öðrum sólkerfum, hafi þar með fengið enn eitt púslið til að skilja alheiminn.

mbl.is
Fleira áhugavert
Fleira áhugavert