Námu sprengingu yfir Beringssundi

Gríðarstór loftsteinn splundraðist yfir Beringssundi, undan austurströnd Rússlands, í desembermánuði, samkvæmt upplýsingum frá NASA. Sprengingin sem varð er loftsteinninn splundraðist við komuna inn í andrúmsloft jarðar var sú næstöflugasta af þessum sökum síðustu 30 árin og leysti úr læðingi afl sem var á við tíu kjarnorkusprengjur á borð við þá sem sprengd var í Hírósíma í síðari heimsstyrjöld, samkvæmt frétt BBC af málinu.

Rúm sex ár eru nú liðin frá því enn stærri loftsteinn kom inn í andrúmsloft jarðarinnar yfir Úral-fjöllum í Rússlandi og var kraftur sprengingarinnar yfir Beringssundi í desember einungis um 40% af því afli sem þar losnaði úr læðingi. Hátt í 1.000 manns slösuðust þá vegna höggbylgjunnar sem myndaðist þegar loftsteinadrífan skall á jörðinni nærri borginni Chelyabinsk og olli miklum skemmdum.

Frétt af mbl.is

Tæplega þúsund slösuðust í Rússlandi

Lindlay Johnson, sérfræðingur hjá NASA, segir við BBC að einungis megi búast við vígahnöttum af þessari stærð um það bil tvisvar eða þrisvar á hverri öld, en gervihnettir Bandaríkjahers námu sprenginguna 18. desember síðastliðinn og lét herinn NASA vita í kjölfarið.

Loftsteinninn splundraðist í 25,6 kílómetra hæð yfir jörðu og vakti ekki athygli er hann kom inn í andrúmsloftið, þar sem hann splundraðist yfir afskekktu hafsvæði, en Johnson segir rannsakendur vera að kanna hvort flugmenn sem voru í loftinu á þessum slóðum hafi orðið varir við vígahnöttinn.

Frétt af mbl.is

Eru loftsteinar stærsta áskorun mannkyns?

• Blogga um frétt