50 ár frá tungllendingunni

Haldið var upp á 50 ára afmæli tungllendingarinnar í Washington, …
Haldið var upp á 50 ára afmæli tungllendingarinnar í Washington, höfuðborg Bandaríkjanna, í dag. Hér hefur Appolo 11 verið varpað á Washinton-minnismerkið. AFP

50 ár eru í dag liðin frá því Bandaríkjamennirnir Neil Armstrong og Buzz Aldrin lentu tunglfarinu Erninum á yfirborði tunglsins og stigu fæti þangað fyrstir manna.

Fjórum dögum áður hafði Appolo 11, geimfari NASA, verið skotið á loft frá Kennedy-geimstöðinni í Flórída í Bandaríkjunum. Talið er að um hálfur milljarður manna hafi fylgst með fyrstu skrefum Armstrong á tunglinu en við það tækifæri lét hann falla þau eftirminnilegu ummæli „Eitt lítið skref fyrir mann, en stórt skref fyrir mannkynið.“

Hjálmar Sveinsson verkfræðingur og Páll Theódórsson eðlisfræðingur lýstu lendingunni í beinni útsendingu í Ríkisútvarpinu og má heyra lýsinguna á heimasíðu RÚV.

Armstrong og Aldrin voru um tvo tíma og korter á yfirborði tunglsins og söfnuðu þeir rúmu 21 kílógrammi af efnum af yfirborði tunglsins sem þeir fluttu með sér til jarðar.

Í geimmiðstöðinni í Houston fengu gestir að prófa að klæða …
Í geimmiðstöðinni í Houston fengu gestir að prófa að klæða sig í geimbúninga. AFP
mbl.is