Google fellst á að greiða frönskum skattyfirvöldum milljarð

Google þarf að greiða rúman milljarð dollara í sektir og vangoldna skatta til að ljúka deilu sinni við frönsk skattyfirvöld. Wall Street Journal greinir frá þessu og segir Google nú hafa gefið eftir, eftir áralanga rannsókn á því hvort fyrirtækið hafi gefið upp allan hagnað af starfsemi sinni í landinu. 

Saksóknari fjármálarannsókna hjá franska ríkinu greindi í gær frá því að dómstólar hefðu fallist á 550 milljón evra sekt sem Alphabet Inc., dótturfyrirtæki Google, hefði fallist á að greiða vegna rannsóknar á skattamálum fyrirtækisins. Saksóknari hefur verið með til rannsóknar meint skattaundanskot Google frá 2015, eða frá því að kvörtun barst frá frönskum skattyfirvöldum vegna framtals fyrir fjögurra ára tímabil þar á undan. 

Wall Street Journal segir Google hafa staðfest samkomulagið og að fyrirtækið hafi einnig fallist á að greiða 465 milljónir evra í vangoldna skatta. Hafa frönsk skattyfirvöld árum saman fullyrt að Google borgaði of lítið.

Wall Street Journal segir ákvörðunina hafa komið nokkuð á óvart, ekki síst í ljósi þess að franskur dómstóll hafnaði fyrir tveimur árum kröfu franskra skattyfirvalda um að Google greiddi 1,1 milljarð í skatt fyrir árin 2005-2010 á grundvelli þess að fyrirtækið hefði gefið upp of lítinn hagnað og of lágan skattstofn.

• Blogga um frétt