Baráttufólk jákvæðrar líkamsímyndar fagna nýjum reglum sem samfélagsmiðillinn Instagram hefur sett hvað varðar efni og auglýsingar á miðlinum sem tengjast megrunarvörum og lýtaaðgerðum.
Samkvæmt reglunum verða sumar færslur faldar fyrir notendum 18 ára og yngri á meðan aðrar, til að mynda þar sem verið er að auglýsa hvers kyns töfralausnir, verða alfarið bannaðar. Breytingarnar eru gerðar í kjölfar aukins sýnileika lýtalækninga og megrunarherferða á samfélagsmiðlum og þeirra áhrifa sem efnið hefur á ungt fólk.
Leikkonan Jameela Jamil segir breytingarnar mikinn sigur en hún hefur verið iðin við kolann að láta stjörnur heyra það sem mæla með megrunarvörum á samfélagsmiðlum, sérstaklega á Instagram.
„Instagram tekur afstöðu með líkamlegri og andlegri heilsu samfélagsmiðlanotenda og sendir heiminum mikilvæg skilaboð,“ segir Jamil.
View this post on InstagramA post shared by Jameela Jamil (@jameelajamilofficial) on Sep 18, 2019 at 10:08am PDT
Jamil hefur til að mynda skrifað fjölda athugasemda við færslur hjá raunveruleikastjörnum, til að mynda Kardashian-systrum, Amber Rose og Cardi B, sem ýmist auglýsa „detox“-te, megrunarsleikjóa eða megrunarþeytinga.
Fylgjendur Jamil fagna einnig breytingunum og spyrja jafnvel hvort þeir geti virkjað þann möguleika að sjá ekki færslur sem eru bannaðar innan 18 ára, þó svo að notendur hafi aldur til.
Notendur geta nú tilkynnt færslur sem ýta undir neikvæða líkamsímynd til Instagram og farið fram á að þær verði fjarlægðar.