Fyrsti geimgöngumaðurinn látinn

Rússinn Alexei Leonov, sem fyrstur manna fór í geimgöngu, er látinn eftir langa baráttu við illvíg veikindi. Hann varð 85 ára. Frá þessu greinir rússneska geimferðastofnunin Roscosmos í tilkynningu, með harm í hjarta.

Leonov var fyrstur manna til þess að fara út úr geimskipi í geimnum, en það gerði hann árið 1965, er hann yfirgaf geimflaugina Voskhod 2 í 12 mínútur og níu sekúndur.

Geimgangan gekk fullkomlega upp, en heimferð hans og félaga hans, Pavels Belyayev, gekk hinsvegar verr. Voskhod 2 brotlendi í skóglendi í Síberíu, en báðir komust geimfararnir lífs af.

Leonov var náinn vinur Júrí Gagarín, sem varð fyrsti maðurinn til þess að fara út í geim árið 1961. Hann var tvívegis sæmdur hetjuorðunni, æðstu heiðursorðu Sovétríkjanna.

Vladimír Pútín Rússlandsforseti og Alexei Leonov saman árið 2017. AFP

• Blogga um frétt