Boeing prófaði nýjan risa

Bandaríski flugvélaframleiðandinn Boeing prófaði í gær nýja flugvél, Boeing 777X, en vélin er stærsta tveggja hreyfla flugvél heims. Prufuflugið fór fram nærri höfuðstöðvum Boeing í grennd við Seattle og flaug vélin í fjóra tíma.

Flugið gekk að óskum, sem hljóta að teljast gleðifregnir fyrir Boeing, sem hefur átt erfitt uppdráttar undanfarið ár eftir að tvö banvæn flugslys MAX-véla fyrirtækisins kostuðu 346 mannslíf og leiddu til alþjóðlegrar kyrrsetningar helstu söluvöru fyrirtækisins sem ekki sér fyrir endann á.

Flugfélagið Emirates í Sameinuðu arabísku furstadæmunum verður fyrsta flugfélagið til að hagnýta sér þessar nýju risavélar Boeing. AFP

Fimmtíu og fimm milljarða listaverð

Boeing segist hafa selt 309 777X-vélar til þessa, en hver og ein vél kostar yfir 442 milljónir Bandaríkjadala samkvæmt verðlistum Boeing, jafnvirði 55 milljarða íslenskra króna eða þar um bil.

Flugfélagið Emirates í Sameinuðu arabísku furstadæmunum verður fyrsta flugfélagið til að hagnýta sér þessar nýju risavélar Boeing, en frekari prófana er þörf áður en að hægt verður að afhenda vélarnar þangað.

• 2 blogg um fréttina

Bloggað um fréttina

• Ómar Ragnarsson: Því færri hreyflar, því hagkvæmari kostur.
• G. Tómas Gunnarsson: Mögnuð flugvél - með "samanbrjótanlega vængi".