Jákvæðar niðurstöður úr klínískum rannsóknum

Líftæknifyrirtækið Alvotech hefur unnið að þróun hliðstæðu lyfsins Humira, sem er meðal annars notað við liðagigt, og eru niðurstöður klínískra rannsókna fyrirtækisins jákvæðar.

Í fréttatilkynningu frá Alvotech er talað um líftæknihliðstæðu á söluhæsta lyfi heims undanfarin ár. „Um er að ræða líftæknilyfshliðstæðu lyfsins Humira sem er í dag söluhæsta lyf heims og selst fyrir um 20 milljarða Bandaríkjadala á ári (um 2.500 milljarðar króna). Fyrirtækið tilkynnti í mars á síðasta ári um fasa I og fasa III klínískar rannsóknir í 23 löndum vítt og breitt um Evrópu með þátttöku 900 einstaklinga. Þeim rannsóknum er nú lokið með jákvæðum niðurstöðum,“ segir í fréttatilkynningu frá Alvotech. 

Frétt af mbl.is

Samið um markaðssetningu í 36 löndum

Frétt af mbl.is

Klínískar rannsóknir hafnar hjá Alvotech

Róbert Wessman, stofnandi og stjórnarformaður Alvotech, segir í fréttatilkynningunni það mikilvægan áfanga fyrir fyrirtækið að tilkynna jákvæðar niðurstöður fyrstu klínísku rannsókna fyrirtækisins. 

„Í dag eru átta líftæknilyf í þróun hjá Alvotech og við höldum áfram að styrkja okkar innviði og fjárfesta í framtíðinni. Um 460 vísindamenn og sérfræðingar starfa nú hjá Alvotech í fjórum löndum og við væntum þess að geta haldið áfram að fjárfesta í íslensku efnahagslífi á næstu árum og skapa mikilvægar útflutningstekjur,“ segir Róbert.

Alvotech mun framleiða og selja líftæknihliðstæðu lyfsins Humira í samstarfi við aðra á öllum lyfjamörkuðum heims. „Með tilkomu lyfsins skapast umtalsverður sparnaður fyrir heilbrigðisyfirvöld um allan heim og rannsóknir hafa jafnframt sýnt fram á aukið aðgengi sjúklinga að nýjum líftæknilyfjum, þegar líftæknihliðstæðulyf koma á markað. Líftæknilyfshliðstæða Alvotech er frábrugðin lyfjum samkeppnisaðila að því leyti að það er 100 mg/ml formúlering, sem er talin þægilegri fyrir sjúklinga,“ segir í tilkynningu Alvotech. 

• Blogga um frétt