Vísbendingar um líf á Venusi

Agnir af fosfín-gasi eru að finna í andrúmslofti Venusar en þessi lofttegund hefur á jörðinni tengst örverum. 

Vísindamenn greindu frá þessu í dag og varpa þessi tíðindi ljósi á þær aðstæður sem eru uppi á þessari nágrannaplánetu okkar.

Aðstæðum á Venus hefur oft verið líkt við helvíti og er hitinn þar að degi til nægilega mikill til að bræða blý. Andrúmsloftið samanstendur nánast eingöngu af koltvísýringi.

Hópur sérfræðinga notaði sjónauka á Hawaii og í Atacama-eyðimörkinni í Síle til að rannsaka skýjahulu yfir Venusi um 60 kílómetrum frá yfirborðinu. Þar komu þeir auga á agnir af fosfíni, sem er eldfimt gas.

Í tímaritinu Nature Astronomy lögðu sérfræðingarnir áherslu á að þótt þeir hafi fundið fosfín þýði það ekki að líf sé á Venusi.

Alan Duffy, stjörnufræðingur hjá Swinburne-háskóla í Ástralíu, sagði þrátt fyrir það að uppgötvunin væri „ein mest spennandi vísbending um mögulegt líf á annarri plánetu sem ég hef nokkru sinni séð”.

Umfjöllun um uppgötvunina á Stjörnufræðivefnum 

• 1 blogg um fréttina

Bloggað um fréttina

• Ómar Ragnarsson: Líkurnar á lífi á öðrum hnöttum óendanlega miklar?