Stærsta bottanet heims tekið úr umferð

Emotet var umsvifamesta bottanet heims í meira en áratug.
Emotet var umsvifamesta bottanet heims í meira en áratug. Ljósmynd/Twitter

Lögregluyfirvöld hafa haldlagt þúsundir tölva sem notaðar voru til að starfrækja eitt stærsta og hættulegasta net botta (e. bot) í heimi, netkerfi sem kallast Emotet. Emotet-netkerfið var notað til að hakka tölvur fórnarlamba í gegnum tölvupóst, viðhengi eða spilliforrit og safna þaðan upplýsingum sem seldar voru áfram í undirheimum netsins.

Aðgerðin var framkvæmd af lögregluyfirvöldum í Bretlandi, Frakklandi, Þýskalandi, Litháen, Úkraínu, Kanada, Hollandi og Bandaríkjunum. Europol segir Emotet hafa verið stærsta bottanet síðasta áratugar. BBC greinir frá.

„Þegar kerfið komst inn í tölvur einstaklinga var aðgangurinn seldur til umsvifamikilla glæpahringja sem notuðu upplýsingarnar í sínum glæpum, til að stela frekari upplýsingum eða kúga fé með spilliforritum,“ sagði í yfirlýsingu Europol.

Á Twitter-aðgangi Europol er útskýrt hvernig Emotet virkaði og hvers vegna það var svo hættulegt sem raun bar vitni.

mbl.is