Áreiðanleg ofurtölva væntanleg

Veðurstofur Íslands, Danmerkur, Írlands og Hollands hafa tekið höndum saman um rekstur reiknilíkana og úrvinnslu veðurgagna með nýrri ofurtölvu sem staðsett verður á Veðurstofu Íslands. Markmiðið með samstarfinu er að stuðla að framþróun í skammtíma veðurspám og auka áreiðanleika gagna.  

Fjallað er um ofurtölvuna á vef Veðurstofunnar.

Þar segir að grunnur samstarfsins liggi í aukinni þörf fyrir áreiðanlegri veðurspár sem styðja ákvarðanatöku þegar kemur að vályndu veðri og áhrifum loftslagsbreytinga.

Samstarf þessara fjögurra veðurstofa gengur undir heitinu United Weather Centres – West en með samstarfinu eykst geta þjóðanna til að gæta að öryggi sínu gagnvart áhrifum aukinna öfga í veðri sem afleiðingar loftslagsbreytinga.  

Væntanleg til landsins árið 2023

Auk þess að veita nákvæmari skammtíma veðurspár, mun nýja ofurtölvan sem framleidd er af Hewlett Packard Enterprise (HPE), stuðla að framþróun á rannsóknum í loftslagsvísindum. Sú framþróun og samstarfið í heild sinni mun styðja við áætlanir stjórnvalda og atvinnulífs þegar kemur að aðlögun vegna áhrifa loftslagsbreytinga.   

Ofurtölvan á að vera komin í gagnið snemma árs 2023 og mun þá veita aðgang að nákvæmari háupplausna veðurspám sem bæta veðurþjónustu til framtíðar með áreiðanlegri veðurviðvörunum.

„Við viljum vera í stakk búin til að svara auknum kröfum um nákvæmari og ítarlegri veðurspár, bæði til að auka öryggi landsmanna og þeirra ferðamanna sem landið sækja. Loftslagsbreytingar kalla einnig á öflugri reiknigetu og meiri samvinnu við gerð loftlagssviðsmynda til þess að sem best mynd fáist á þær breytingar á veðráttu og veðurfari sem samfélagið stendur frammi fyrir og þarf að aðlaga sig að”, er haft eftir Árna Snorrasyni, forstjóra Veðurstofu Íslands.

Árni Snorrason forstjóri Veðurstofu Íslands. Mbl.is/Sigurður Bogi Sævarsson

• 1 blogg um fréttina

Bloggað um fréttina

• Hörður Þórðarson: Til hamingju!