Hvað er vitað um Ómíkron-afbrigðið?
Setja bókamerki
Ómíkron-afbrigði kórónuveirunnar greindist fyrst í Suður-Afríku og hefur náð verulegri útbreiðslu þar. Sama þróun hefur sést víðar og hefur afbrigðið dreift sér á áður óséðum hraða hvað afbrigði kórónuveirunnar varðar, að sögn Alþjóðaheilbrigðismálastofnunarinnar. BBC tók saman það sem hægt er að læra af reynslu Suður-Afríku.
Veldur Ómíkron-afbrigðið vægari veikindum?
Gögn um spítalainnlagnir vegna Covid-19 í Suður-Afríku leiða í ljós að þeim hefur fjölgað verulega að undanförnu á landsvísu. En fjölgunin er ekki jafn brött og búast hefði mátt við miðað við aukningu tilvika. Færri sjúklingar þurfa á aukasúrefni og öndunarvélum að halda. Þá hefur fólk almennt legið inni á spítala í styttri tíma undanfarið en áður var.
Suður-Afríska heilbrigðismiðstöðin Discovery Health reiknaði það út að fólk sem smitaðist snemma í Ómíkron-bylgjunni hefði verið 30% minna líklegt til þess að vera lagt inn á spítala en fólk sem smitaðist í fyrstu kórónuveirubylgju Suður-Afríku í fyrra.
Þarlendir vísindamenn segja þó að þetta sýni ekki að Ómíkron-afbrigðið sé vægara en fyrri afbrigði kórónuveirunnar. Þegar litið er til fyrrnefndra útreikninga þarf að taka með í reikninginn að nú er hluti þjóðarinnar bólusettur og nokkuð er einnig um náttúrulegt ónæmi gegn veirunni. Slíkt var ekki til staðar í fyrstu bylgju faraldursins.
Veikjast börn verr af Ómíkron?
Fréttir frá spítölum á þeim svæðum sem eru hvað verst sett hvað smit varðar sem stendur sýna að innlögnum barna vegna Covid-19 hefur fjölgað. Einhverjir hafa bent á þessar tölur og sagt að afbrigðið virðist hættulegra börnum en fyrri afbrigði.
Slíkum fullyrðingum telur Helen Rees, prófessor hjá Witwatersrand háskóla í Jóhannesarborg, að eigi að taka með varúð þar sem um er að ræða mjög takmarkaðar tölfræðilegar upplýsingar. Þá er ekki hægt að greina á milli þeirra barna sem lögð hafa verið inn vegna undirliggjandi sjúkdóma og þeirra sem raunverulega hafa verið lögð vegna veikinda af völdum Covid-19.
Hvert er hlutverk bólusetninga í baráttunni við Ómíkron?
Einungis um 26% Suður-Afrísku þjóðarinnar hafa verið fullbólusett gegn Covid-19 svo það er erfitt að draga ályktanir fyrir betur bólusettar þjóðir út frá gögnum frá Suður-Afríku. Þar í landi hefur aftur á móti nokkuð hátt hlutfall þjóðarinnar smitast af kórónuveirunni og þannig fengið ónæmi gegn henni.
Muge Cevik, doktor hjá háskólanum í St. Andrews, telur að hætta á smiti milli manna minnki verulega þegar fólk er fullbólusett þar sem bólusettir veikist í styttri tíma ef þeir smitast og losna fyrr við veiruna. Þannig hefur hún takmarkaðri möguleika á að dreifa sér með bólusettum en óbólusettum.
Það er samt sem áður á hreinu að Ómíkron-afbrigðið dreifir hratt úr sér, jafnvel hjá þjóðum með hærra bólusetningarhlutfall.
Þrír skammtar komi í veg fyrir 90% innlagna
Þó að bólusetningar geti ekki komið alfarið í veg fyrir smit er útlit fyrir að þær gegni mikilvægu hlutverki í að koma í veg fyrir alvarleg veikindi af völdum Covid-19, jafnvel þegar fólk smitast af Ómíkron-afbrigðinu. Það er þó ekki á hreinu hversu mikil vörnin gegn alvarlegum Ómíkron-veikindum er.
Fyrstu niðurstöður úr rannsóknum í Suður-Afríku benda til þess að bóluefni Pfizer komi í veg fyrir um 70% innlagna og það hlutfall fer upp í 90% ef fólk hefur fengið viðbótarskammt.
Eyjafjarðarbraut lokað vegna alvarlegs umferðarslyss
Sex hafa greinst með listeríu
Skiptir miklu meira máli en fólk grunar
Væri að ljúga ef ég segðist ekki stressaður
Árshátíð ríkislögreglustjóra haldin í Tékklandi
Banna mengandi búnað sem leyfður er á Íslandi