Opinbera íslenska útgáfu af vinsælum orðaleik

Íslenskir áhugamenn um stafsetningu og orðaleiki geta glaðst yfir því að tölvuleikurinn Orðla hefur litið dagsins ljós.

Hjálmar Gíslason, framkvæmdastjóri og stofnandi hugbúnaðarfyrirtækisins Grid, deildi leiknum á Twitter í gær með skilaboðunum: „Góða skemmtun.“

Orðla er íslensk útgáfa af bandaríska tölvuleiknum Wordle sem hefur vakið mikla lukku netverja undanfarnar vikur.

Eingöngu ætlaður nánustu fjölskyldu

Josh Wardle, hugbúnaðaverkfræðingur og upphafsmaður tölvuleiksins vestan hafs, sagði í viðtali við New York Times á dögunum að upphaflega hefði orðaleikurinn eingöngu verið ætlaður nánustu fjölskyldu. Vinsældir hans meðal fjölskyldunnar hafi aftur á móti orðið til þess að hann ákvað að gera leikinn aðgengilegan öllum í október á síðasta ári.

Rúmlega tveimur mánuðum síðar hafa yfir 300 þúsund spilað hann.

Leikurinn sem um ræðir gengur út á það að spilarar eiga að giska á eitt orð og hafa þeir sex tilraunir til þess. Við hverja ágiskun fá spilarar meldingu um hvort bókstafirnir sem þeir hafa valið tilheyra orðinu sem leitast er eftir – og hvort stafirnir séu rétt staðsettir.

Þrátt fyrir að leikurinn geti reynst ávanabindandi þá er hann ekki tímafrekur, þar sem einungis er hægt að spila hann einu sinni á dag, til að finna orð þess dags.

• Blogga um frétt