Lamaður einstaklingur sem hvorki getur talað né vélritað gat stafað meira en þúsund orð með því að nota taugastoðtæki sem þýðir heilabylgjur hans í heilar setningar að sögn bandarískra vísindamanna.
„Allt er mögulegt,“ var einn af uppáhaldsfrösum mannsins að sögn Sean Metzger, sem fer fyrir rannsókninni hjá háskólanum í Kaliforníu San Francisco (UCSF).
Á síðasta ári sýndi teymið fram á að heilaígræðslan, sem kallast heila-tölvuviðmót (e. brain–computer interface), gæti þýtt 50 algeng orð sem einstaklingurinn reyndi að segja að fullu.
Rannsóknin var nýverið birt í tímaritinu Nature Communications. Þar segir að teymið hafi getað þýtt heilabylgjur einstaklingsins er hann stafaði stafrófið.
„Þannig að ef hann er að reyna segja köttur, myndi hann segja charlie-alpha-tango [sem stafar orðið cat, enska orðið yfir köttur],“ sagði Metzger í viðtali við AFP-fréttaveituna.
Vísindamennirnir gátu þýtt fleiri en 1.150 orð, sem ná „yfir 85% af innihaldi náttúrulegra enskra setninga“, sagði í niðurstöðum rannsóknarinnar.
Gert er ráð fyrir að hægt verði að stækka orðaforðann upp í 9.000 orð, sem samsvarar fjölda orða sem flestir einstaklingar nota á einu ári.
Einstaklingurinn sem tók þátt í rannsókninni kallast BRAVO1 og er á fertugsaldri. Hann fékk heilablóðfall á þrítugsaldri sem leiddi til þess að hann getur ekki talað, en vitsmunaleg virkni hans er þó óskert. Hann á að venju samskipti við fólk með því að nota bendi sem er fastur við derhúfu. Þannig ýtir hann á stafi á tölvuskjá.
Árið 2019 var tölvuviðmótið grætt í heila mannsins með skurðaðgerð og síðan þá hafa vísindamennirnir getað rannsakað heilabylgjur mannsins er hann reynir að segja eitthvað.