BMW afhjúpaði bíl sem getur skipt litum og getur sýnt stafræn gögn inn á framrúðu, meðal annars frá aksturstölvu, á viðburði tengdum CES-tæknisýningunni í Las Vegas í Bandaríkjunum í gær.
Ytra byrði bílsins getur verið í öllum regnbogans litum, bæði í einlit og marglita í ýmsum útfærslum.
BMW hefur með hönnuninni opnað á möguleikann að breyta framrúðunni í fullgildan skjá með tækni sem blandar saman sýndarveruleika og raunveruleika.
Arnold Schwarzenegger, leikari og fyrrum ríkisstjóri Kaliforníuríkis, var viðstaddur þegar BMW i VISION Dee bíllinn var kynntur. Hann grínaðist með bílinn sem gæddur er slíkri tækni.
„Ég var svolítið áhyggjufullur því í flestum myndunum mínum voru tækin óvinir okkar, nú eru þau okkar bandamenn.“