Uppgötvunin ekki vísbending um líf

Sævar Helgi Bragason, betur þekktur sem Stjörnu-Sævar, telur að uppgötvun teymis vísindamanna frá Cambridge-háskóla varðandi reikistjörnuna K2-18b sé ekki endilega vísbending um líf eins og þeir hafa haldið fram. Sævar fjallar um málið í færslu á samfélagsmiðlinum Facebook. 

Vísindamenn frá Cambridge-háskóla greindu frá því að þeir hafi í mælingum sínum fundið sameind sem kallast dímetýl súlfíð á reikistjörnunni K2-18b sem er í 124 ljósára fjarlægð frá jörðu.

Vísindamennirnir héldu því fram að þetta væru sterkustu sönnunargögn til þess um líf utan jarðar. Það er vegna þess að á jörðu myndast sameindin einungis í tengslum við lífverur. 

Frétt af mbl.is

Vísbendingar um líf á öðrum hnetti

Óábyrg vísindamiðlun

Sævar telur framsetningu vísindamannanna dæmi um óábyrga vísindamiðlun.

Sævar bendir á það að þrátt fyrir að dímetýl súlfíð myndist aðeins á jörðinni í tengslum við lífverur hafa sameindin samt sem áður fundist á stöðum sem eru ekki lífvænlegir, til að mynda á halastjörnum. 

Hann bendir á það að þrátt fyrir að reikistjörnur eins og K2-18b gætu vel verið lífvænlegar sé ekki nægilega mikið vitað um þær eða þau ferli sem eiga sér stað í þeim. Að hans sögn gætu verið ýmsar leiðir fyrir dímetýl súlfíð að myndast í framandi umhverfi.

Að lokum segir Sævar að þrátt fyrir að upppgötvunin sé áhugaverð og spennandi, sé hún alls, alls ekki vísbending um líf eins og vísindamennirnir halda fram. 

Ekki náðist í Sævar Helga við vinnslu fréttarinnar.

• 2 blogg um fréttina

Bloggað um fréttina

• Ingólfur Sigurðsson: Möguleg vísbending um líf í geimnum? Erum við ein í …
• Guðjón E. Hreinberg: Marvel Vísindin