Sjóbirtingsveiði fer vel af stað

Fyrstu veiðisvæðin til stangveiða opna að jafnaði þann fyrsta apríl ár hvert, einkum fyrir sjóbirting. Samkvæmt fyrstu fréttum þá veiddist víða vel þennan fyrsta dag veiðitímabilsins þrátt fyrir nokkurn kulda.

Fram kemur hjá fyrirtækjum Icelandic Fly Fishermen, sem annast leigu á Tungulæk við Kirkjubæjarklaustur, að opnunardagurinn hafi verið frábær þrátt fyrir að alhvít jörð hefði  verið á bökkum árinnar. Fram kom að ríflega 100 sjóbirtingum af öllum stærðum hafi verið landað í dag á þrjár stangir. Eingöngu er veitt á flugu í Tungulæk og öllum fiski sleppt aftur.

Í næsta nágrenni við Geirlandsá  opnaði stjórn Stangveiðifélags Keflavíkur samkvæmt venju. Þar veiddust í dag um 80 fiskar sem voru allt að 91 cm langir. Veitt er á fjórar stangir  í Geirlandsá.

Tungufljót í Skaftártungu opnaði með álíka hvelli og hinar, en þar komu um 70 fiskar á land á stangirnar fjórar. Var talsvert af stórfiski í afla veiðimanna og var sá stærsti 91 cm.

Húseyjarkvísl í Skagafirði gaf um 40 sjóbirtinga í dag þrátt fyrir að hálfvetrarlegt væri úti við. Að sögn Valgarðs Ragnarssonar sem hefur leigt ána um árabil voru 10 af þeim yfir 60 cm, en hinir þaðan af minni.

Þá opnuðu líka Litlaá í Kelduhverfi og Varmá í Ölfusi og samkvæmt fyrstu fréttum það fór veiði vel af stað þó heildarveiði dagsins liggi ekki fyrir.

Við Húseyjarkvísl fyrr í dag. Valli

• Blogga um frétt

Seinustu hundraðkallar sumarsins