Sæmundará skammt frá Sauðárkróki fer vel af stað. Tæplega fimmtíu laxar eru komnir á land, en einungis er veitt á tvær stangir fyrstu daga veiðitímans. Þriðja stöngin bætist við nú um helgina. Jóhann Valur Stefnisson, einn leigutaka Sæmundarár segir stöðuna í ánni góða. Töluvert hefur sést af laxi og mikið af honum er vænn.
Nýtt veiðihús var tekið í notkun í vor og er það afar glæsilegt og hefur ekkert verið til sparað. Jóhann Valur segir mikla ánægju með húsið og það sé án ef eitt það glæsilegasta þar sem veiðimenn sjá um sig sjálfir.
Félagið Melhorn ehf hefur gert samning um leigu á Sæmundará til fjórtán ára. Melhorn eiga, Jóhann Valur, Leifur Aðalsteinsson og Jóhannes Þ. Guðmundsson. „Þegar við byrjuðum með ána var hún að skila okkur sumarveiði upp á tíu til tólf fiska. Síðasta sumar voru bókaðir 450 laxar úr Sæmundará," segir Jóhann Valur í samtali við Sporðaköst.
Mikið er af stórlaxi í Sæmundará og ekki óalgengt að þar veiðist fiskar sem ná þeirri eftirsóknarverðu lengd, 100 sentímetrar. Áin er 17 kílómetrar að lengd og er því nóg pláss fyrir veiðimenn.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |