Víða á Vesturlandi er kominn kraftur í smálaxagöngur. Neðst í Langá, Grímsá, Laxá í Kjós og víðar er mikið af fiski á neðri svæðum. Vatnsmiklir fossar og kalt vatn hægja á dreifingu fisksins. Það mun ekki gerast af krafti fyrr en sumarið lætur sjá sig.
Ólafur Kr. Ólafsson var við veiðar í Soginu í vikunni og fékk með félögum sínum tíu laxa á einum degi. Hann sagði í samtali við Sporðaköst að fiskur hefði verið í nánast öllum veiðistöðum en þeir félagar voru að veiða Bíldsfellssvæðið. "Smálaxinn var að koma inn af fullum krafti."
Svipaða sögu er að segja af Þjórsá en þar eru mjög stórar smálaxagöngur og mikið af fiski í Urriðafossi.
Veiðin í Húseyjarkvísl hefur gengið ágætlega. þar eru nú komnir á land fimmtíu laxar og smálaxinn er farinn að láta sjá sig. Valgarður Ragnarsson leigutaki er í leiðsögn með veiðimönnum við ána og segir hann afar ánægjulegt að sjá smálaxinn mæta. "Þetta er frekar snemmt hjá okkur að hann sé mættur. Og hann virðist vera í meira magni en oft áður. Fiskur hefur dreift sér vel um ána. Það sem helst hefur truflað okkur er mikill vindur síðustu daga. En það hlýtur að lagast ef kemur sumar," sagði Valli í samtali við Sporðaköst.
Í bland við smálaxinn kemur meira af tveggja ára laxi og oftar en ekki mæta stóru hængarnir á þessum tíma.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |