Tugir Íslendinga fara á hverju ári til að veiða sjóbleikju á Grænlandi. Nokkrir hópar hafa farið í sumar og láta vel af veiðinni. Davíð Ingason, er einn þeirra sem nýlega kom úr slíkri ferð. „Við vorum í fyrra fallinu sögðu heimamenn okkur en við veiddum mjög vel. Ætli við höfum ekki landað um tvö hundruð bleikjum á þremur veiðidögum. Og við vorum ekki að stunda þetta stíft. Veiddum fimm til sex tíma á dag,“ sagð Davíð Ingason í samtali við Sporðaköst.
Davíð segir þetta hafa verið mikið ævintýri. Allt farið á bátum og svo gengið. Bleikjurnar voru að taka bæði flugur eins og Peter Ross og Black Zulu og einnig púpur á borð við Peacock og Krókinn. „Menn reyndu líka Nobbler og aðrar straumflugur. En þessar hefðbundnu flugur og púpur voru að gefa okkur bestu veiðina.“
Flestum bleikjunum var sleppt en menn tóku sér í soðið og einnig fyrir starfsfólkið í búðunum. Búðirnar eru staðsettar við lítinn vog skammt frá Eiríksfirði. Þarna er náttúruleg höfn og aðstæður allar hinar bestu fyrir útgerð af þessu tagi. Jóhann Norðfjörð er með þessa útgerð og segir Davíð að allt hafi verið eins og best verður á kosið.
Þar sem þetta var við upphaf veiðitímans var kjöt af skornum skammti í búðunum. Davíð var beðinn um að bjarga því og fara og skjóta hreindýr. Það var auðsótt mál og skaut hann lítinn tarf af hundrað metra færi, eftir leiðsögn staðarhaldarans. „Við átum hann svo með glæsibrag.“
Árnar eru margar hverjar mjög stuttar og stríðar en hægt er að finna lengri ár með meiri hyljum. „Sumar af þessum ám sem við vorum að veiða voru ekki nema par hundruð metrar. Sumar kannski aðeins lengri.“
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |