Stangaveiðitímabilinu lýkur formlega í Veiðivötnum á Landmannaafrétti á miðvikudag. Stefnir í að veiðin fari í ríflega tuttugu þúsund fiska, sem flokkast sem gott meðalár og í samræmi við síðustu ár, jafnvel ívið meira. Síðustu tölur sem birtar voru er áttunda veiðivikan og þá var heildartalan komin í 18.510 silunga. Áttunda vikan gaf 1.219 fiska og var veiðin áberandi mest í Litlasjó og flestir veiðimenn voru þar við veiðar. Litlisjór gaf 452 urriða þessa viku. Nokkuð var um stórfiska um og yfir átta pund.
Í sumar hafa flestir fiskar fengist í Snjóölduvatni eða tæplega 4.900. Næstflestir fiskar hafa svo veiðst í Litlasjó eða tæplega 4.500.
Stærsti fiskurinn er 12 punda urriðinn sem veiddist í vor í Hraunvötnum. Besta meðalþyngdin er hins vegar úr Pyttlum eða 3,3 pund.
Þegar kemur að fjölda fiska hefur bleikjan vinninginn fram yfir urriðann. Tæplega tíu þúsund bleikjur hafa veiðst en urriðarnir eru tæplega 8.600.
Síðustu daga hefur veiði verið ágæt og einn þeirra sem var við veiðar fyrr í mánuðinum er Gunnar Ólafur Kristleifsson. Hann var að koma úr sínum þriðja túr í Veiðivötn í sumar. „Það er mikið farið að róast yfir þessu. Þetta er svona kropp og svo finnur maður staði þar sem hann er í stuði og þá getur maður gert góða veiði,“ sagði Gunnar í samtali við Sporðaköst.
Hann nefndi menn sem voru að veiða nokkrum dögum á undan honum sem voru á Hrauninu í Litlasjó og þeir fengu eina kvöldstund 26 urriða og allt á Nobblera, bæði svarta, hvíta og appelsínugulan. Fiskurinn var á bilinu tvö til sex pund.
„Þetta snýst um að hitta á þetta. Ég er bara að veiða í soðið. Ég er ekki mikið að sleppa þessu. Fæ mér í soðið og aðeins fer í reyk og svo gref ég líka. Ég er búinn að fá í soðið í sumar.“
Síðasti túr hjá Gunnari gaf níu fiska. Fjóra á spún og fimm tóku beitu.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |